Бу елның алты аенда Татарстанда юл һәлакәтләрендә 227 бала зыян күргән

Бу хакта Татарстан Министрлар Кабинетында узган брифингта республиканың сәламәтлек саклау министры Альмир Абашев әйтте. “Бу елның алты аенда балалар катнашында 206 юл һәлакәте теркәлгән, аларда 6 бала һәлак булган, 227се зыян күргән”, – диде ул.

Министр әйтүенчә, балалар машина йөртүчеләр тарафыннан юлда йөрү кагыйдәләрен үтәмәү аркасында бәлагә тарый. “Аерым алганда, автомобильгә тиешле саннан да күбрәк кеше утыра, саклык каешын эләктермичә йөриләр”, – диде Альмир Абашев.

Министр сүзләренә караганда, юл-транспорт һәлакәтендә балалар баш сөяге-ми җәрәхәтләре, сыну һәм имгәнүләр, аннан да аянычлырагы – тормыш белән ярашмый торган җәрәхәтләр ала. Бу елның алты аенда юл һәлакәтләрендә зыян күргән балаларның 189 ы хастаханәгә озатылган, 89 балага амбулатор ярдәм күрсәткәннәр.